अफगानिस्तानमा एक अफगान सैनिकले दुई अमेरिकी सैनिकको हत्या गरेका छन् । मारिनेमा लान्कास्टर, ओहायोका २९ वर्षिय जोसेफ कलेट र कर्टेज कोलाराडोका ३३ वर्षीष विल लिन्डसे रहेको बताइएको छ । उनीहरू कान्दाहारमा रहेको अफगान सैन्य अखडाको भ्रमण गर्ने क्रममा सहकर्मी हत्याको शिकार भएका हुन् ।
कान्दाहारका प्रहरी उपप्रमुख मोहमद कसमले अमेरिकी सेनाले अफगान सैन्य अखडाको भ्रमण गर्नेक्रममा दुई अमेरिकी सैनिक मारिनुको साथै अन्य घाइते भएको बताएका छन् ।
अमेरिकी सेनाले पनि उनीहरू मारिएको पुष्टि गरेको छ । तर, उसले घटनाका विस्तृत विवरण भने दिएको छैन ।
अफगान सैन्य अखाडामा रहेका तालिवान समर्थक सैनिकले आक्रमण गरेको हुन सक्ने आशंका गरिएको छ । तर, तालिबानका प्रवक्ताले अमेरिकी सेनाको हत्या गर्ने व्यक्ति आफ्ना लडाकू नरहेको स्पष्ट पारेका छन् । उनले ती व्यक्ति देशभक्त अफगान सैनिक भएको बताए ।
अफगानिस्तानमा भएको यो सहकर्मी आक्रमणलाई राष्ट्रपति ट्रम्पले गम्भिरतापूर्वक लिएको ह्वाइट हाउसले जनाएको छ । यस घटनाले आगामी राष्ट्रपतिको चुनावअघि नै अफगानिस्तानबाट अमेरिकी सैनिक फिर्ता गर्ने राष्ट्रपति ट्रम्पको योजनालाई बल पुगेको बताइएको छ ।
अफगानिस्तानमा अहिले पनि १४ हजार अमेरिकी सैनिक रहेका छन् ।
