राजधानीको सानेपास्थित रिङरोडमा आइतबार दिउँसो भएको सवारी दुर्घटनामा परी दुई जनाको ज्यान गएको छ।

दिउँसो करिब साढे तीन बजेको समयमा स्कारपियो गाडीले मोटरसाइकललाई ठक्कर दिँदा २ जनाको मृत्यु भएको महानगरीय प्रहरी परिसर ललितपुरका प्रवक्ता नारायण चिमौरियाले जानकारी दिए।

दुई वटा जिप र एउटा मोटरसाइकल आपसमा ठोक्किँदा भएको दुर्घटनामा मोटरसाइकलमा सवार दुबै जनाको ज्यान गएको हो। एक जनाको घटनास्थलमै र अर्का एक जना गम्भीर घाइतेको उपचारको क्रममा मृत्यु भएको प्रहरीले जनाएको छ।

एकान्तकुनाबाट बल्खु जाँदै गरेको बा १६ च ४७४३ नम्बरको स्कारपियोले अनियन्त्रित भई विपरित दिशाबाट आइरहेको बा १२ च ५७७६ नम्बरको स्कारिपयो र बा ४३ प ९८६३ नम्बरको मोटरसाइकललाई ठक्कर दिएको थियो।

प्रवक्ता नारायण चिमौरियाका अनुसार ज्यान गुमाउनेमा ललितपुर गोदावरीका ४० वर्षीय गोविन्दप्रसाद शर्मा र नुवाकोट घर भई कलंकी बस्दै आएका २७ वर्षीय चन्द्रमणि मूडभरी छन्।

स्कारपियो चालकलाई प्रहरीले नियन्त्रणमा लिएको छ। थप अनुसन्धान भइरहेको प्रहरीले जनाएको छ।