माइक्रोसफ्ट कम्पनीका मालिक बिल गेट्स फेरि विश्वको सबैभन्दा धनी व्यक्ति बन्न सफल भएका छन्। अमेजनका संस्थापक जेफ बेजोसको सम्पत्ति घटेपछि बिल गेट्स पुनः शीर्ष स्थानमा उक्लिएका हुन्।
अमेजनको हालको शेयरमा ७ प्रतिशतले कमि आएको छ। यसै कारण बेजोसलाई उछिन्न बिल गेट्स सफल भएका हुन्। अमेजनको हाल घटेको शेयरअनुसार बेजोसको सम्पत्ति १ सय ३ दशमलव ९ अर्ब डलर भएको छ। बिल गेट्सको हालको सम्पत्ति १ सय ५ दशमलव ७ अर्ब डलर आँकलन गरिएको छ।
सन् २०१८ मा बेजोसले २४ वर्षदेखि विश्वको सबैभन्दा धनी व्यक्तिको पहिचान बनाएका बिल गेट्सलाई पछाडि पारेका थिए। यति बेला उनको सम्पत्ति १ सय ६० अर्ब डलरसम्म पुगेको थियो।
बिल गेट्स सन् १९८७ मा पहिलो पल्ट विश्वको धनी व्यक्ति बन्न सफल भएका थिए। जेफ बेजोस १९९८ मा अमेरिकाका ४ सय धनी व्यक्तिको सूचिमा अटाएका थिए। बेजोसको यही वर्षको अप्रिलमा श्रीमतिसँग पारपाचुके भएको थियो। उनले श्रीमतिसँग छुट्टिनका लागि पनि महंगो रकम खर्चेका थिए।
