भौतिक पूर्वाधार खासगरी सडक विकासले हाम्रो आधुनिकीकरण प्रयाससँगै प्राथमिकता पाउँदै आएको क्षेत्र हो। सबै आवधिक योजनामा सडक निर्माणले उच्च प्राथमिकता पाउँदै आएको छ। विगतका प्रयासहरूको प्रतिफलस्वरूप ५३ प्रतिशत खण्ड कालोपत्रे, १३,०६० किलोमिटर (किमि) लामो सडक सञ्जाल तथा ६० प्रतिशत भाग कालोपत्रे ५,३०० किमि राजमार्ग निर्माण भइसकेका छन्। जेजति उन्नति हासिल भएका छन्, त्यो अपर्याप्त छ। सडकको अभाव तथा निर्माण भएकै सडक पनि कमजोर डिजाइन तथा स्तरकै कारण रुग्ण अवस्थामा छन्।