राष्ट्राध्यक्षका हैसियतमा पहिलो चीन भ्रमण (११–१८ बैशाख) मा राष्ट्रपति विद्यादेवी भण्डारीले सत्तापक्ष र प्रमुख प्रतिपक्षका दुई नेतालाई आफ्नो जोडबलमा चीन भ्रमण दलमा सामेल गरिन्। ती थिए, सुनसरी–४ बाट प्रतिनिधि सभामा निर्वाचित नेपाली कांग्रेसका केन्द्रीय सदस्य ज्ञानेन्द्रबहादुर कार्की र सत्तारुढ नेकपाका स्थायी समिति सदस्य योगेश भट्टराई। कांग्रेस नेता कार्की र नेकपा नेता भट्टराईलाई आफ्नो राजकीय भ्रमण दलमा सामेल गराएर सायद राष्ट्रपति भण्डारीले पति स्व मदन भण्डारी र आफ्नो गृहजिल्लाको सन्तुलन मिलाउन खोजेकी थिइन्। किनभने, सुनसरीबाट प्रतिनिधि सभामा प्रतिनिधित्व गरेपनि कांग्रेस नेता कार्की राष्ट्रपति भण्डारीको गृहजिल्ला भोजपुरकै हुन् भने नेकपा नेता भट्टराई स्व मदन भण्डारीको जन्मजिल्ला ताप्लेजुङका।
चिनियाँ राष्ट्रपति सी चिनफिङले अघि सारेको बेल्ट एण्ड रोड इनिसिएटिभ (बीआरआई) को दोस्रो अन्तर्राष्ट्रिय फोरमकै सन्दर्भमा राष्ट्रपति भण्डारीबाट चीनको राजकीय भ्रमण भएको दुई हप्ता पुग्न लागेपनि यसको चर्चा अझै सेलाएको छैन। गणतन्त्र स्थापनापछि चीनले नेपालका राष्ट्रपतिको पहिलो राजकीय भ्रमण आयोजना गरि उच्च सम्मान दिएको छ भने त्यस क्रममा नेपाल–चीनबीच पारवहन सम्झौताको प्रोटोकलमा हस्ताक्षर पनि भएको छ। यसै सन्दर्भमा राष्ट्रपतिको भ्रमण दलका सदस्य नेकपा स्थायी समिति सदस्य योगेश भट्टराईसँग नेपालखबरले गरेको वार्ताको सम्पादित अंशः
