१३औं दक्षिण एसियाली खेलकुद (साग) अन्तर्गत पुरुष क्रिकेटमा नेपालले बंगलादेशसँग पराजित भएको छ।
कीर्तिपुरस्थित त्रिवि क्रिकेट मैदानमा भएको खेलमा नेपाल बंगलादेशसँग ४४ रनले पराजित भएको हो। १ सय ५६ रनको लक्ष्य पछ्याएको नेपाल निर्धारित २० ओभरमा १११ रनमै समेटियो।
नेपालको लागि कप्तान ज्ञानेन्द्र मल्लले सर्वाधिक ४३ रन बनाए । यस्तै उपकप्तान दिपेन्द्र सिंह ऐरीले १६, पारस खड्काले ९ रन बनाए। पवन सर्राफ र आरिफ शेख एक रन पनि नजोडी आउट हुन पुगे।
बंगलादेशका तान्भिर इस्लाम, सौम्या सरकार, सुमोन खान र मेहेदी हसनले समान २/२ विकेट हात पारे।
यसअघि पहिले ब्याटिङ गरेको बंगलादेश यू २३ ले ६ विकेट गुमाएर १५५ रन बनायो।
बंगलादेशका लागि कप्तान नाजमुल होसेन सान्तोले ६० बलमा ४ छक्का र ४ चौकाको मद्दतमा अविजित ७५ रन बनाए।
यस्तै आफिफ होसेनले ५२ रन बनाए।
नेपालका पारस खड्काले ३ विकेट हात पारे। यस्तै दिपेन्द्र सिंह ऐरीले २ तथा अविनास बोहराले १ विकेट लिए।
चार खेलमा दुई जित र दुई हार व्यहोरेको नेपाल अंक तालिकाको तेस्रो स्थानमा रहेको छ।
नेपालले ४ खेलमा ४ अंक जोडेको छ।
बंगलादेश यू २३ ले ३ खेलमा ३ जित हात पार्दै ६ अंकका साथ तालिकाको शिर्ष स्थानमा उक्लिएको छ। यस्तै श्रीलंका यू २३ समेत ३ खेलमा ६ अंकका साथ तालिकाको दोस्रो स्थानमा छ।
श्रीलंका र बंगलादेश एक खेल अगावै फाइनल प्रवेस गरेका छन्। अब नेपालले कास्य पदकको लागि माल्दिभ्ससँग खेल्ने छ ।
