स्पेनिस ला लिगामा एट्लेटिको मड्रिडले इस्पान्योलमाथि पूनरागमन जित निकालेको छ ।
घरेलु टोलीले इस्पान्योलमाथि ३–१ को पूनरागमन जित निकालेको हो । एट्लेटिकोको जितमा एन्जल कोरेरा, अल्भेरो मोराटा र कोकीले गोल गरे । सर्जी डार्डेर एक गोल फर्काए ।
१८औं मिनेटमा सर्जीको गोलमा मड्रिड खेलमा पछि परेको थियो । पहिलो हाफको इन्ज्युरी समयको थप गरिएको दोस्रो मिनेटमा कोरेराले बराबरी गोल फर्काएपछि मड्रिड खेलमा फर्किएको थियो ।
५८औं मिनेटमा मोराटाले गोल गर्दै एट्लेटिकोलाई २–१ को अग्रता दिलाए । इन्जुरी समयको थप गरिएको दोस्रो मिनेटमा कोकीले डिएगो कोस्टाको पासमा गोल गर्दै एट्लेटिको मड्रिडलाई ३–१ को पूनरागमन जित दिलाए ।
जितसँगै मड्रिड १३ खेलबाट २४ अंक जोडेर तेस्रो स्थानमा उक्लिएको छ । पराजित इस्पान्योल ८ अंकसहित रेलिगेसन जोनको १९औं स्थानमा छ ।
ला लिगामै सेभिल्लाले रियल बेटिसलाई २–१ ले पराजित गर्दै चौथो स्थानमा उक्लिएको छ । सेभिल्लाको १३ खेलबाट २४ अंक छ । पराजित रियल बेटिस १३ अंकसहित १७औं स्थानमा छ ।
