काठमाडौँ । २०६४ साल चैत २७ गते रौतहटको राजपुर फरहदवा गाविस वडा नम्बर ४ मा रहेको तत्कालिन नेपाली काँग्रेसका उम्मेदवार मोहम्मद अफताव आलमको घरमा बम विष्फोटन भएको थियो ।
जनतालाई आफ्नो प्रभावमा पारी धाँधलीरुपमा निर्वाचन जित्नका लागि भण्डारण गरी राखेको ग्रेनाइट तथा हातहतियार बनाउन संकलन गरी राखेको विष्फोटक पदार्थ र बम समेत विष्फोटन हुँदा मृत्यु र घाइते भएकाहरुलाई इँटाभट्टामा जलाएको आरोपमा निलम्बित सांसद आलमलाई अहिले तीनवटा मुद्दामा सर्वस्वसहित जन्मकैद सजाय माग दाबी गरी मुद्दा दर्ता गरिएको छ ।
सरकारी वकिल कार्यालयले जिल्ला अदालत रौतहटमा बुझाएको अभियोगपत्रमा विभिन्न प्रत्यक्षदर्शीहरुको बयानलाई समेटिएको छ । तीमध्ये एक पात्र हुन्, शेख ओलजाहिर ।
शेख तिनै व्यक्ति हुन् जसले विष्फोटन भई भत्केको घर छाना जिर्णोउद्धार गरेका थिए । अभियोगपत्रमा समावेश उनको बयानमा आफू र परिवारलाई मार्ने धम्की दिएर भत्केको गोठ घर निर्माण गर्न लगाएको उल्लेख गरेका छन् । पुनः निर्माण सकिएपछि अन्य पुराना घरबाट माकुराको जालो ल्याएर घरको छानोमा जालो लगाइ घटनास्थल परिवर्तन गराएको पनि बयान दिएका छन् ।
