नेपाल भ्रमणमा रहेको मेरिलेबोन क्रिकेट क्लब (एमसीसी) विरुद्धको एकदिवसीय खेलमा नेपाली यू–१९ राष्ट्रिय क्रिकेट टोली पराजित भएको छ ।
आइतबार भएको खेलमा नेपाली टिम एमसीसीसँग ३८ रनले पराजित भएको हो ।
एमसीसीले दिएको ३ सय ३५ रनको फराकिलो लक्ष्यसहित जवाफी ब्याटिङ गरेको नेपालले ५० ओभरमा ९ विकेट गुमाएर २ सय ९६ रन मात्र बनाउन सक्यो ।
नेपालका लागि विकेटकिपर हरि बहादुर चौहानले सर्वाधिक ५२ रन जोडे । कप्तान रित गौतम ४५, लोकेश बम १८ रनमा पेभिलिएन फर्के ।
यस्तै खडक बहादुर बोहरा २६, विशाल विक्रम केसी १३ र अरुण ऐरी ३० रनमा क्याच आउट हुन पुगे ।
यसअघि किर्तिपुरस्थित टियु क्रिकेट मैदानमा टस हारेर पहिले ब्याटिङ गरेको एमसीसीले ५० ओभरमा ७ विकेट गुमाएर ३ सय ३४ रन बनाएको थियो ।
एमसीसीका लागि विल रोड्सले ९३ रनको अर्धशतकीय इनिङ्स खेले । यस्तै मिल्स हामोन्ड र टम वेट्सलीले समान ६५ रनको अर्धशतकीय इनिङ्स खेले ।
एमसिसिका लागि बिलि गोडलम्यानले २२,विल भ्यान्डर्सपर्स २४, एड योउङ ४५ र माइल्स ह्याम्नोल्ड ६५ रन बनाए ।
नेपालका सागर ढकाल र शेर मल्लले समान २/२ विकेट लिए । यस्तै कुशल मल्ल र आकाश चन्दले १/१ विकेट लिए ।
अब एमसीसीले सोमबार नेपाली राष्ट्रिय टिमसँग एकदिवसीय खेल खेल्नेछ । एकदिवसीयपछि एमसीसीले नेपालसँग टी–ट्वान्टी र फस्ट क्लास क्रिकेट खेल्ने छन् ।
नेपाली क्रिकेट विकासको लागि तयार गरेको लिगेसी टुर अन्तर्गत एमसीसी टिम नेपाल आएका हुन् ।
