भरतपुरको हाकिमचोक भन्दा केही तल रिजाल चोक छ । रिजाल चोकबाट करिब २ सय मिटर अगाडि पुगेपछि बायाँतर्फ एउटा सानो क्याफे देखिन्छ, होप क्याफे ।
गुलाबी रङ पोतिएको एउटा सानो क्याफेभित्र एक युवती र अर्की किशोरी मःम बनाउनमा व्यस्त थिए ।
रातोपाटीको टोली क्याफेमा पुग्दा रातो कुर्ता र कालो सलवारमा रहेकी एक युवती बाहिर निस्किइन् । उनी थिइन्, होप क्याफेको सञ्चालिका कल्पना अधिकारी ।
हामीलाई देख्ने बित्तिकै हल्का मुस्कुराएर उनी बाहिर निस्किइन्, मानौँ पहिले नै चिनेजानेको व्यक्तिजस्तो ।
सुरुमै उनले के खानुहुन्छ भन्दै अर्डर लिन आइन् ।
हामीले मःमः खाने भनेपछि उनी फेरि भित्र गइन् ।
अनि भित्र रहेकी अर्की किशोरीसँग मिलेर आँटामा किमा भरेर मःमः बनाउन थालिन् ।
केही समयमा मःमः तयार भयो । मःमः लिएर कल्पना बाहिर आइन् ।
