म्यानचेस्टर सिटी काराबाओ कप फुटबलको क्वाटरफाइनलमा प्रवेश गरेको छ ।
मंगलबार राति घरेलु मैदान इदिहाद स्टेडियममा भएको खेलमा साउथह्याम्पटनलाई ३–१ गोल अन्तरले पराजित गर्दै सिटीले क्वाटरफाइनलको यात्रा तय गरेको हो ।
सिटीलाई जित दिलाउन सर्जियो अग्युरोले दुई गोल गरे । निकोलस ओटामेन्डीको नाममा एक गोल रह्यो ।साउथह्याम्पटनका ज्याक स्टेफेन्सले एक गोल फर्काए ।
खेलको २२ औं मिनेटमा निकोलसको गोलबाट सिटीले अग्रता बनाएको थियो । ३८ औं मिनेटमा अग्युरोले गोल गर्दै सिटीको अग्रता २–० को बन्यो ।
खेलको ५६ औं मिनेटमा अग्युरोले व्यक्तिगत दोस्रो गोल गर्दै सिटीलाई ३–० को अग्रता दिलाए ।
त्यसपछि खेलको ७५ औं मिनेटमा साउथह्याम्पटनका ज्याकले एक गोल फर्काए पनि सिटीले ३–१ ले खेल आफ्नो बनायो ।
