बलिउडकी स्टार नायिका दीपिका पादुकोण महाभारतको चर्चित पात्र द्रोपदीको भूमिकामा देखापर्ने भएकी छिन्। मधु मन्टेनाले निर्माण गर्न लागेको ‘महाभारत’ फिल्ममा दीपिका मुख्य भूमिका निर्वाह गर्दैछिन्।
फिल्म द्रोपदीलाई केन्द्रमा राखेर बनाउन लागिएको हो। फिल्मको पटकथा द्रोपदीकै वरिपरि घुम्ने छ।यो फिल्ममा दीपिकाको पनि लगानी रहने बताइएको छ। उनले मधु मन्टेनासँग मिलेर फिल्ममा लगानी गर्न लागेकी हुन्।यो चलचित्रको प्रदर्शन सन् २०२१ को तिहारलाई लक्षित गरिएको छ । दीपिका आफैले पनि यो चलचित्र आफ्ना लागि विशेष र चुनौतीपूर्ण रहेको सुनाएकी छिन् ।
तर, यही मितिमा बलिउडका अर्का सफल निर्देशक संजयलिला भन्सालीले नयाँ चलचित्रको घोषणा गरेका छन् । संजयले ‘बैजु बाबरा’ नामक चलचित्र बनाउने घोषणा गरेका छन् । यो चलचित्र उनले नै निर्देशन गर्न लागेको ‘गंगुबाई कठियावाडी’पछि रिलिज हुनेछ ।
संजयले पनि चलचित्रको प्रदर्शन मिति सन् २०२१ को तिहारलाई नै तोकेका छन् । योसँगै उनकी प्रिय नायिकासँग उनको चलचित्रको भिडन्त हुने पक्का भएको छ ।
संजयसँग दीपिकाले ‘रामलीला, बाजिराओ मस्तानी, पद्यमावत’ जस्ता चलचित्रमा काम गरिसकेकी छिन् ।
