रुकुम पश्चिममा ट्याक्टर दुर्घटना हुँदा चालकसहित २ जनाको घटनास्थलमै मृत्यु भएको छ। मृत्यु हुनेमा सानीभेरी गाउँपालिका–१ का २६ वर्षीय चन्दबहादुर विक चालक र २२ वर्षीय महेन्द्र विक रहेका छन् ।
चौरजहारी नगरपालिकाबाट पुर्तिमकाँडा जाँदै गरेको भे १ च ५१० नं ट्याक्टर सल्लेनी घेरामा शुक्रबार दुर्घटना भएको जिल्ला प्रहरी कार्यालय रुकुम पश्चिमका डीएसपी सुमित खड्काले जानकारी दिए ।
तिहारको सामान लिएर जाँदै गरेको ट्याक्टर सडकबाट करिब २० मिटर तल खसेको हो। मृतकको शव पोस्टमार्टम आजै गरेर परिवारलाई जिम्मा लगाउने तयारी गरिएको प्रहरीले जनाएको छ।
