नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले सरकारको दोहोरो चरित्र आफूहरूलाई सैह्य नहुने बताएका छन्। 

बालुवाटारमा भएको समाजवादी मोर्चाको बैठक सकेर पत्रकारहरूसँग छोटो कुरा गर्दै उनले भने ‘सहमति पनि गर्ने अनि घेराबन्दीमा पार्ने खालको सरकारको दोहोरो चरित्र चल्दैन।’

उनका अनुसार त्यसबारे थप छलफल र निर्णय आजै साँझ बस्ने मोर्चाको बैठकले गर्नेछ। 

२०७६ सालमा दायर भएको एउटा मुद्दामा चन्दलगायत उनका पार्टीका नेता खड्गबहादुर विश्वकर्मा, माइला लामा र राजु कार्कीविरुद्ध जिल्ला अदालत काठमाडौंले मंसिर तेस्रो साता ३५ दिने पक्राउपूर्जी जारी गरेको थियो। 

२०७७मा उनी र उनका पार्टीका नेताविरुद्ध लगाइएका सबै मुद्दाहरू खारेज हुने गरी तत्कालीन केपी ओली सरकारले सहमति गरेपछि उनी सार्वजनिक राजनीतिक जीवनमा फर्किएका थिए। 

सरकारको नेतृत्व गरिरहेको नेकपा माओवादीसहित ‘समाजवाद’को अवधारणा बोकेका पार्टीहरूको समाजवादी मोर्चामा विप्लव समूहको पार्टी पनि एउटा घटक हो।