इंग्लिस प्रिमियर लिग फुटबलमा आर्सनलले एस्टन भिल्लामाथि पुनरागमन जित निकालेको छ । घरेलु मैदान इमिरेट्स स्टेडियममा आइतबार राति भएको खेलमा १० खेलाडीमा समेटिएको आर्सनलले ३–२ को पूनरागमन जित निकालेकने हो ।

आर्सनलको जितमा निकोलस पेपे, कलुम च्याम्वर्स र पिएरे हेनरिक औवामियाङले समान एकएक गोल गरे । एस्टन भिल्लाका लागि जोन म्याक्जिन र वेस्लेले गोल गरे ।

खेलको २०औं मिनेटमा जोनले अनवर इएल घाँजीको पासमा गोल गर्दै भिल्लालाई अघि बढाएका थिए । ४१औं मिनेटमा आर्सनल १० खेलाडीमा समेटियो । आर्सनलका एन्सले मेटल्यान्ड नाइल्स दोहोरो पहेँलो कार्ड खादै मैदानबाट बाहिरिएका थिए । पहिलो हाफ उक गोलमै सकिदाँ दोस्रो हाफमा थप चार गोल भयो ।

खेलको ५९औं मिनेटमा पेपेले पेनाल्टीमार्फत बराबरी गोल फर्काए । त्यसको एक मिनेटपछि नै वेस्लेले गोल गर्दै भिल्लालाई खेलमा २–१ को अग्रता दिलाए ।खेलको ८१औं मिनेटमा च्याम्वर्सले गोल गर्दै खेललाई पुनः २–२ गोलको बराबरीमा ल्याए । ८४औं मिनेटमा औवामियाङले गोल गर्दै आर्सनललाई ३–२ को पूनरागमन जित दिलाए।

जितसँगै आर्सनल ६ खेलबाट ११ अंक जोडेर चौथो स्थानमा उक्लिएको छ । पराजित भिल्ला ४ अंक जोडेर १८औं स्थानमा छ ।