विनोद चौधरीले सन् २००० मा सुरु गरेको हस्पिटालिटी व्यवसायलाई उचाइमा पु¥याउने जिम्मेवारी माइँला छोरा राहुलको काँधमा छ । उनी सन् २००६ मा होटेल व्यवसायमा छिर्दा चौधरी समूहअन्तर्गत एक दर्जनजति होटेल सञ्चालनमा थिए, अहिले १ सय २७ होटेल पुगिसके । नेपाल, भारत, भुटान, श्रीलंका, माल्दिभ्स, चीन, दुबई, न्युयोर्कदेखि अफ्रिकासम्म लक्जरी होटेल फैलिसकेका छन् । ग्रुपले वर्षमा १० देखि १५ होटेल थपिरहेको छ । चौधरी ग्रुपका प्रबन्ध निर्देशक राहुलको लक्ष्य छ– सन् २०२० सम्म दुनियाँभर दुई सय होटेल पु¥याउने र सन् २०२५ सम्म नेपालको अर्बपति होटेलियर बन्ने । राहुलले नयाँ पत्रिकाका नवीन अर्यालसँग व्यक्त गरेको दृष्टिकोण, उनकै शब्दमा :

नेपाल विश्वकै अलौकिक मुलुक हो । तीन–चार घन्टामै हिमालको मुटु कमाउने चिसोदेखि तराईको हपहपी गर्मीसम्म अनुभव गर्न सकिन्छ । यसरी नेपालमा प्रकृतिले पर्यटक लोभ्याउने सम्पूर्ण चिज दिएको छ । हाम्रो भौगोलिक अवस्थिति पनि गज्जबको छ, उत्तरतिर चीन र दक्षिणतिर भारत । विश्वकै विशाल र तीव्र आर्थिक विकास गरिरहेका मुलुकको बीचमा नेपाल छ । दुई मुलुकमा साढे दुई अर्ब जनसंख्या छ । अहिले चिनियाँ र भारतीयको खर्च गर्ने क्षमता ह्वात्तै बढेको छ । विश्वभर घुमफिर गर्नेमा पनि चिनियाँ र भारतीय नै अगाडि छन् । नेपालमा पहिले युरोपियन र अमेरिकन बढी आउँथे । अहिले चिनियाँ र भारतीय बढी आउँछन् ।