काठमाडौं– गोरखाको वारपाक केन्द्रविन्दु बनाएर विनाशकारी भूकम्प गएको चार वर्ष वितेको छ । यो चार वर्षमा भएको पुनर्निर्माणको प्रगति अत्यन्त सुस्त देखिन्छ ।
भूकम्प गएको ५ वर्षभित्रमा निजी तथा सरकारी संरचनाको निर्माण सम्पन्न गरिसक्ने लक्ष्य लिए पनि चार वर्षको अवधिमा समग्रमा ५० प्रतिशत अर्थात आधा मात्रै पनि पुनर्निर्माणको काम पूरा हुन सकेको छैन ।
पुनर्निर्माणको यस्तै गति रहिरहने हो भने पुनर्निर्माण सम्पन्न हुन अझै चार वर्ष लाग्ने देखिन्छ ।
राष्ट्रिय पुनर्निर्माण प्राधिकरणमा सरकार फेरिएपिच्छे प्रमुख कार्यकारी अधिकृत परिवर्तन, पुनर्निर्माणका विषयमा राजनीतिक दलहरुको दाउपेच र सरकारी नीति फेरबदल भइरहँदा पुनर्निर्माणले गति लिन नसकेको प्रष्टै छ ।
