प्रधानमन्त्री केपी शर्मा ओलीले ‘टेक एन्ड पे’ राम्रो गर्नको लागि ल्याइएको तर नराम्रो गर्ला जस्तो लागेर हटाइएको बताएका छन्।
मंगलबार बसेको प्रतिनिधि सभाको बैठकमा उठेको प्रश्नको जवाफ दिँदै उनले निजी क्षेत्रसँग विद्युत खरिदसम्बन्धी पीपीएमा राम्रो उद्देश्यले टेक एन्ड पे को व्यवस्था गरिएपनि नराम्रो हुने देखेर फिर्ता लिइएको बताए।
उनले भने, ‘टेक एन्ड पे’ राम्रो गर्नको लागि ल्याइएको थियो, नराम्रो गर्ला कि जस्तो लाग्यो, हटाइयो।’
सोमबार सत्ता पक्षका शीर्ष नेताहरूबीचको छलफलबाट ‘टेक एन्ड पे’ हटाउने निर्णय भएको थियो।
शासकीय सुधारका विभिन्न कार्यक्षेत्रमा सुधार गर्नुपर्ने विषयमा उच्चस्तरीय शासकीय सुधार आयोग गठन गरिएको उनले जानकारी दिए।
उनले भने,‘शासकीय सुधारका विभिन्न कार्यक्षेत्रमा सुधार गर्नुपर्ने विषयमा उच्चस्तरीय शासकीय सुधार आयोग गठन गरिएको हो। अन्धाधुन्ध काम गर्नुभन्दा त्यसैमा केन्द्रीत भएर खोज, अध्ययन, अनुसन्धान गर्न र त्यसमा आधारित भएर सिफारिस र प्रेसक्रिप्सनहरूमा काम अघि बढाउनु उचित हुन्छ।’
