राष्ट्रपति डोनाल्ड ट्रम्पको नेतृत्वमा नयाँ अमेरिकी प्रशासनले ठूलो चिनियाँ लगानीका लागि अझ खुला रहने अपेक्षा गरिएको छ।
‘मैले बुझेको छु कि राष्ट्रपति ट्रम्पले अघिल्लो प्रशासनको तुलनामा अमेरिकामा चिनियाँ लगानीलाई धेरै स्वागत गर्नेछन्। चिनियाँ उद्यमहरूले संयुक्त राज्य अमेरिकामा रोजगारी सिर्जना गर्न उत्साहित हुनेछन्,’ अमेरिका-चीन सम्बन्धको राष्ट्रिय समितिका अध्यक्ष स्टीफन ओर्लिन्सले भने, ‘हाल एक अर्ब डलरभन्दा बढीको लगानी छ। उहाँले अनुमतिहरू जारी गर्न अझ सजिलो बनाउने बताउनु भएको छ। त्यसैले यो क्षेत्र सुधार गर्न सकिन्छ भन्ने भावना छ।’
ओर्लिन्सले दुई देशबीचको व्यापार सम्झौतामा संरचनागत सुधारहरू समावेश गर्दा चिनियाँ उपभोक्ता र उद्यमी दुवैलाई आर्थिक फाइदा पुग्नेगरी व्यापार सम्बन्धमा सुधार ल्याउने कुरा पनि उल्लेख गरे। ट्रम्पको शपथ समारोहमा चिनियाँ उपराष्ट्रपति हान झेङले भाग लिएका थिए।
ट्रम्पले गरेका महत्वपूर्ण निर्णय
डोनाल्ड ट्रम्पले चार वर्षपछि ह्वाइट हाउसमा फर्किएपछि आफ्नो दोस्रो कार्यकालको सुरुवात गरेका छन्। त्यसक्रममा उनले विभिन्न दस्तावेजहरूमा हस्ताक्षर गरेका छन् भने केही आदेश समेत जारी गरेका छन्।
सोमबार राति अमेरिकाको ४७ औं राष्ट्रपतिका रुपमा सपथ ग्रहण गर्दै उनले मंगल ग्रहमा अन्तरिक्ष यात्री पठाउने समेत घोषणा गरेका छन्। वाशिंगटन डीसीमा चिसो मौसमको कारण उनको उद्घाटन समारोह घरभित्र आयोजना गरिएको थियो।
ट्रम्पले प्रधानन्यायाधीश जोन रोबट्र्सबाट आफ्नो पदको सपथ लिएका थिए। शपथपछि उनले मेक्सिकोसँगको सीमानामा राष्ट्रिय सङ्कटकालको घोषणा गरेका छन्। त्यस्तै उनले बाइडेन प्रशासनले लागु गरेका झण्डै ८० वटा प्रावधानहरूलाई उल्ट्याएका छन्। पेरिस जलवायु सम्झौताबाट अमेरिका बाहिरिएको घोषणा पनि गरेका छन्।
त्यस्तै उनले सरकारी खर्च प्रभावकारीता सम्बन्धी विभागको स्थापना, विश्व स्वास्थ्य सङ्गठनको सदस्यताबाट बाहिरिने, दक्षिणी सिमानामा ‘राष्ट्रिय सङ्कटकाल’को घोषणा, टिकटक विरुद्धको प्रतिबन्ध कार्यान्वयनमा आउनमा अस्थायी रोक प्रक्रिया अघि बढाउने घोषणा गरेका छन्।
त्यस्तै राष्ट्रपति ट्रम्पको कार्यकारी आदेशबाट चार वर्षअघि अमेरिकी संसद् भवन क्यापिटलमा जबर्जस्ती प्रवेश गरेर हुलदङ्गा भएको घटनामा संलग्न झण्डै १६ सय जनालाई क्षमादान दिने निर्णय पनि गरेका छन्।
उनले तेल र ग्यासको उत्पादन बढाउने पनि घोषणा गरेका छन्। ट्रम्पले सबैभन्दा बलियो सेना निर्माण गर्ने वाचा पनि गरेका छन्। राष्ट्रपतिले मेक्सिकोको खाडीको नाम बदलेर गल्फ अफ अमेरिका राख्ने र पनामा नहर फिर्ता लिने कुरा दोहोर्याएका छन्।
(एजेन्सीको सहयोगमा)
.jpg)
