नेकपा (एकीकृत समाजवादी)ले संसद्को गतिरोध अन्त्यका निम्ति पहल गर्ने निर्णय गरेको छ।
बिहीबार बसेको सचिवालय बैठकले संसदको गतिरोध अन्त्य गर्न प्रतिपक्ष नेपाली कांग्रेससहित प्रधानमन्त्री पुष्पकमल दाहाल ‘प्रचण्ड’तथा उपप्रधान एवं गृहमन्त्री रवि लामिछानेसँग छलफल गर्ने निर्णय गरेको हो।
अहिलेसम्म संसदको गतिरोध अन्त्यबारे बोलाइएका छलफलमा एकीकृत समाजवादीलाई सामेल गराइएको छैन।
कांग्रेसले सहकारीको रकम अपचलनमा गृहमन्त्री लामिछानेको संलग्नता देखिएको आरोप लगाउँदै निष्पक्ष र स्वतन्त्र छानबिनका लागि संसदीय समिति गठनको माग गरेर संसद् बैठक अवरुद्ध गर्दै आएको छ।
यता, एकीकृत समाजवादीकाे सचिवालय बैठकले पार्टीको महाधिवेशनमा प्रस्तुत गरिने दस्तावेज जेठ १५ गते जिल्लामा पठाउने निर्णय गरेको छ।
एकीकृत समाजवादीले महाधिवेशन आउँदो असार १६ देखि २० काठमाडौँमा गर्ने तय गरेको छ।
