जुम्लाको चन्दननाथ नगरपालिकाकी मेयर कान्तिका सेजुवाल नेपाली कांग्रेसको केन्द्रीय सदस्यमा निर्वाचित भएकी छन्।
कांग्रेसको १४ औँ महाधिवेशनमा १ हजार ८५२ मत प्राप्त गरी निर्वाचित भएकी हुन्। उनी कांग्रेस जुम्लाकाे इतिहासमा निर्वाचित केन्द्रीय सदस्य बन्ने पहिलाे हुन्। यसअघि कांग्रेस नेता दीनवन्धु श्रेष्ठ मनोनित केन्द्रीय सदस्य भएका थिए।
चन्दननाथ नगरप्रमुखसमेत रहेकी सेजुवालले कांग्रेसको केन्द्रीय सदस्यमा संस्थापन पक्षबाट उम्मेदवार दिएकी थिइन्। कांग्रेस जुम्लाका तत्कालीन सभापति मानव सेजुवालको हवाईजहाज दुर्घटनामा परी मृत्यु भएपछि उनकी पत्नी कान्तिका कांग्रेस जुम्लाको राजनीतिमा उदाएकी हुन्।
स्नातकोत्तर तहकाे शैक्षिक उपाधि हासिल गरेकी उनी शिक्षक पेसाबाट राजीनामा दिएर राजनीतिमा उदाएकी हुन्।
२०७४ सालको स्थानीय तहको निर्वाचनमा चन्दननाथ नगरपालिकाको मेयर पदका एमाले उम्मेदवार नेता शान्तिलाल महत र माओवादी उम्मेदवार नेता अशोक श्रेष्ठलाई पराजित गर्दै सेजुवाल मेयर पदमा निर्वाचित भएकी थिइन्।
