श्रम, रोजगार तथा सामाजिक सुरक्षामन्त्री कृष्णकुमार श्रेष्ठ आजदेखि युएईमा शुरु हुने छैटौं श्रम मन्त्रीस्तरीय "अबुधाबी डायलग" मा सहभागी हुँदैछन्।
श्रमिक आपूर्ति गर्ने र श्रमिक लिने देशहरुबीच श्रमिकको हित र सुरक्षाका विषयमा समन्वय तथा संवाद गर्ने मञ्चका रूपमा सन २००८ मा स्थापित अबुधाबी डायलगमा यसवर्ष श्रममन्त्री श्रेष्ठसहित श्रम, रोजगार तथा सामाजिक सुरक्षा मन्त्रालयका सचिव सूर्यप्रसाद गौतम र उपसचिव थानेश्वर भुषाल सहभागी हुँदैछन्।
युएईको श्रम मन्त्रालयले आयोजना गर्ने श्रम मन्त्रीस्तरीय बैठकमा नेपालसहित भारत, श्रीलंका, पाकिस्तान, बंगलादेश, फिलिपिन्स, इण्डोनेसिया, मलेसिया, थाइल्याण्ड, बहराइन, साउदी अरेबिया, कुवेत, कतार, भियतनाम, ओमन र युएई सहभागी हुँदैछन्।
आगामी शुक्रबारसम्म जारी रहने अबुधाबी डायलगमा यसवर्ष १६ देशका श्रममन्त्रीसहित अन्तराष्ट्रिय श्रम संगठन, अन्तराष्ट्रिय प्रवासन संगठनलगायतका अन्तर सरकारी तथा अन्तराष्ट्रिय गैह्रसरकारी संघसंस्थाका प्रतिनिधिहरु सहभागी हुनेछन्।
