पछिल्लाे समय सबैभन्दा बढी रूचाइएकाे सामाजिक सञ्जालमध्य एक हाे– टिकटक। जसमा विभिन्न किसिमका भिडियाेहरू अपलाेड गर्न सकिन्छ। १५ देखि तीन मिनेट सम्मको भिडियो बनाएर अपलोड गर्न मिल्ने यसबाट आफ्नो कला प्रस्तुत गर्ने मात्रै होइन, पछिल्लो समय धेरैका लागि सेलिब्रेटी बन्ने थलोसमेत बनेको छ।

हुन त टिकटकमा अपलोड भएका सबै भिडियोहरू हेर्न मिल्ने हुन्छन् भन्ने पनि हुदैन्। तर, यसमा अपलोड गरिएका भिडियोबाट रातारात सेलिब्रेटी बनेकाहरू पनि धेरै छन्। ती मध्य पनि कति त सफल छन्।

पछिल्लो समय टिकटकले थुप्रै कलाकार जन्माएको छ। यती सानो फिल्म मार्केटमा ती सेलिब्रेटीहरूको भविष्य उज्ज्वल छ भनेर ठोक्का गर्न चाहिँ कठिन नै छ। किनकि हरेक दिन टिकटकबाट जन्मेका कलाकारले रँगिन पर्दामा पाइला टेकी रहेका छन्।

टिकटकमा गरेको अभिनयबाट चर्चामा आएका रेश्मा घिमिरे, सुपुष्पा भट्टराई, प्रिज्मा खतिवडा, प्रिन्सि खतिवडा,उषा उप्रेती, गरिमा शर्मा आदि उदाहरणको लागि केही नामहरू मात्र हुन्। जसकाे बारेमा हामीले यहाँ प्रस्तुत गर्ने काेशिस गरेका छाैँ :

बिना राउत

पछिल्ला केही समयदेखि मोडल विना राउत नेपाली म्युजिक भिडियो बजारमा सर्वाधिक चर्चामा छिन्। टिकटकबाट नै उदाएकी बिनालाई लिएर म्युजिक भिडियो बनाउनेहरूको संख्या धेरै छ। तीजका गीतदेखि आधुनिक गीतसम्मका म्युजिक भिडियोमा विना सर्वाधिक व्यस्त छिन्। टिकटकमा बिना र सरोजको जोडी हिट भएपछि उनीहरूलाई एकसाथ लिएर भिडियो बनाउने निर्माताकाे संख्या पनि कम छैन। त्यसैले अहिलेको लागि उनी पनि सफल मोडेल र कलाकार नै हुन्।

गरिमा शर्मा

चितवनकी गरिमा शर्मा टिकटकबाट चर्चामा आइन्। टिकटक हुँदै म्युजिक भिडियोमा यतिबेला रोजाईको मोडल बनेकी गरिमा फिल्ममा डेब्यु गर्ने उत्तम समय कुर्दै छिन्। पल शाह सँगको केमेस्ट्री अत्याधिक रुचाएपछि उनलाई म्युजिक भिडियोमा लिने निर्माताहरूको लाइन छ। उनको कला र सौन्दर्यको सबैले तारिफ गर्छन्। उनी अहिलेकी हिट मोडेल हुन्। टिकटकबाट आएका कलाकारहरू मध्य गरिमा अहिलेकी एकदमै व्यस्त मोडेल हुन्।

उषा उप्रेती

उषा पनि टिकटक बाटै जन्मिएकी कलाकार हुन्। उनी अहिले धेरै म्युजिक भिडियो निर्माता र निर्देशकको नजरमा परेकी छिन्। एक समय त उनले अभिनय गरेका म्युजिक भिडियोहरूले राम्रो ठाउँ पाउँथे तर अहिले भने उनी सुस्ताएकी छिन्। अहिले त 'टाई टाई फिस्' नामकाे उनकाे टिकटकमा १.३ मिलियन फलोअर्स छन्।

प्रिन्सी र प्रिज्मा खतिवडा (जुम्ल्या दिदीबहिनी)

टिकटकबाट एकाएक सेलिब्रेटी बनेका मध्येका एक जाेडी हुन् जुम्ल्या दिदी बहिनी अर्थात् प्रिन्सी र प्रिज्मा खतिवडा यी दिदि–बहिनीहरूकाे भाग्य टिकटकले नै चम्काइदिएको छ। ‘हाम्रो माया जिन्दाबाद‘ नामक शिशिर भण्डारी र बिन्दु परियारको आवाजमा रहेको गीतबाट म्युजिक भिडियोमा प्रवेश गरेका उनीहरूले हालसम्म दर्जनौँ भिडियोमा काम गरी सकेका छन्।

पछिल्लो समय यिनीहरूकाे म्युजिक भिडियोमा माग बढ्दो छ। त्यसैले पनि प्रिन्सी र प्रिज्मालाई टिकटकले जन्माएको सफल कलाकार भन्दा फरक नपर्ला। टिकटकमा प्रिन्सी-प्रिज्माको फलोअर्स ७ मिलियनमाथि छ। उनीहरुले पछिल्लो समय युट्युब च्यानल समेत खोलेका छन्। जसमा, उनीहरुले आफ्ना दैनिक क्रियाकलापहरुको भिडियो अपलोड गर्दै आएका छन्। उनीहरुको युट्युब च्यानल ट्विनी गर्ल्समा ३२ हजार भन्दा बढी सस्क्राइबर पाउन सफल भएका छन्।

डिमोन छेत्री

टिकटकले जन्माएको अर्का कलाकार हुन् डिमोन छेत्री। केही म्युजिक भिडियोमा अवसर पाएका यिनी भने अहिले बेपत्ता छन्। केही म्युजिक भिडियोमा काम गरेका डिमोनलाई न त अहिले निर्माताले पत्याउँछन् न त दर्शक उनलाई हेर्न नै मरीहत्य गर्छन्। डिमोनले कसरी, माया ,म राजकुमार, बनमा वयर पाक्यो लगायत म्युजिक भिडियोमा काम गरेका छन्।

गीता ढुंगाना

अर्की मोडेल हुन गीता ढुंगाना। उनको पनि व्यस्तता उत्तिकै छ। टिकटकबाट जमेकी गीता चक्र बमको 'ओए काजल' नामक म्युजिक भिडियोमा अभिनय गरेपछि एकाएक चर्चामा आएकी थिइन्। गीताको टिकटकमा फलोअर्स ६ लाखमाथि पुगिसकेकाे छ। टिकटकबाट जन्मेकी उनी पनि अहिलेकी सफल मोडेल हुन्।

मन्जिल बस्नेत

टिकटक बाटै आएका कलाकार हुन मन्जिल बस्नेत। उनले पनि नायिका आँचल शर्मासँग म्युजिक भिडियोमा काम गर्ने अवसर पाएका थिए। 'घाममा सुकाइदेऊ' बोलको गीतमा काम गरेका मन्जिल पनि अहिले कहाँ छन् थाहा छैन। गीत त हिट भयो तर कुनै पनि म्युजिक भिडियो निर्देशक/निर्माताले दोश्रो पटक राख्ने आट नै गरेन्। यसैले पनि उनको पालो न आएको हुनुपर्छ। एक समय खहरे खोला जसरी आएका उनी एक दुई वटा म्युजिक भिडियोमा काम गरे तिर्सना मेटे।

रेश्मा घिमिरे

रेश्मा घिमिरे आउन त उनी ठूलो पर्दाबाट नै आएकी हुन् तर चिनायो टिकटकले। उनी टिकटकबाट सेलिब्रेटी बनेकी कलाकार हुन। ‘कान्छी, ‘झिम झिम गर्ने परेली' म्युजिक भिडियोमा काम गरिसकेकी उनकाे ‘इन्स्टाको फोटो' नामक गीत दर्शकले अत्याधिक मन पराएका छन्। पछिल्लो समय एउटा सफल मोडेलको रूपमा परिचित भएकी उनले 'नेपाल आइडल सिजन ४' पनि होस्ट गर्दैछिन्। टिकटकमा सबै भन्दा बढी फलोअर्स हुने कलाकार मध्येकी एक हुन उनी। उनको टिकटकमा १.२ मिलियन फलोअर्स रहेकाे छ। 

स्मारिका ढकाल-सामारिका ढकाल

टिकटकमा पछिल्लो समय धेरै दर्शकले मनपराएका दिदी–बहिनीको जोडी हुन्– स्मारिका र सामारिका ढकाल। टिकटकबाटै उदाएका यी दिदी बहिनिले थुप्रै म्युजिक भिडियोमा अभिनय गरिसकेका छन्। जुन निक्कै चर्चित छन्। टिकटकमा स्मारिकाको ६ लाख र सामारिकाको २ लाखमाथि फलोअर्स छन्। उनीहरुले पनि स्मारिका सामरिक ढकाल नामकाे युट्युब च्यानल खोलेका छन्। उनीहरूले उक्त च्यानलमा समसामायिक विषयवस्तु उठान गरेर हसेउली खालका भिडियो अपलोड गर्ने गर्दछन्। उनीहरुको युट्युब च्यानललाई हाल सम्म करिब तीन लाखले सस्क्राइब गरेका छन्।