कर्णालीका हिमाली जिल्लामा आइतबार बिहानैदेखि लागेको तुवाँलोका कारण हवाई सेवा प्रभावित बनेको छ।
मुगु, हुम्ला, जुम्ला, डोल्पामा सुर्खेत, नेपालगन्जका विमानस्थलबाट जहाजले उडान भर्न सकेका छैनन्। डाँडाकाँडा तुवाँलोले ढाकेपछि उडान नभएको रारा विमानस्थलस्थित तारा एयरलाइन्सका स्टेसन इन्चार्ज लक्ष्मी शाहीले बताए।
उनले भने, 'तुवाँलोले जहाज उडान नभएपछि यात्रु रोकिनुपर्ने अवस्था छ।'
रारा घुम्न आएका आन्तरिक पर्यटक जहाज नउडेपछि एयरपोर्टमै बस्न बाध्य भएका छन्। पर्यटकीय गन्तव्य रारालाई पनि तुवाँलोले ढपक्कै ढाकेपछि भ्रमणमा आएका पर्यटक निराश भएका छन्।
