१ -
नयाँ साल भन्छन् सबै आगो बालेर
निर्दयीसंग खसी कुखुरा अनि रागो ढालेर
अर्कैको परम्परा अपनाएर हामी सकियौं अब
व्यर्थैमामा नबल्ने पानीमा धागो हालेर।
२ -
आफ्नै भन्नेहरुले खुट्टा ताने पछि
थाहै न पाई पछिबाट छुरा हाने पछि
बाँच्न कहाँ सकिन्छ र सोझो बनेर यहाँ हजुर
हामी अनपढलाई सदैव असभ्य माने पछि।
३ -
यसपाली त गर्नु गर्यो
फेरी पानी झरी पर्यो
हुने खाने त ठिकै छ हिटर बालीहाल्छन्
लुते लाङरे नहुने जाड़ै भएर मर्यो।
४ -
म हाँसी रहँदा उसलाई पोल्दो रहेछ
मलाई रुवाउन घरी घरी विष घोल्दो रहेछ
सोझो म उसलाई इमानदार सोच्थें
उ भने चुपचाप शकुनि झैं बोल्दो रहेछ।
५ -
हिजोआज सबै मान्छे कालो माकुरा झैं लाग्छ
सानो लक्ष्य हासिल गर्न अफ्ठ्यारो टाकुरा झैं लाग्छ
खुट्टा तान्ने र कच्चेटमा हान्ने यत्र तत्र सर्वत्र छन्
आफ्नो रहर फुल्नै नपाई ओइली जाने ऑकुरा झैं लाग्छ।
