दाङमा एकजना सशस्त्र प्रहरी मृत अवस्थामा फेला परेका छन् । पूर्वपश्चिम राजमार्गदेखि पचास मिटर उत्तर रहेको लमही नगरपालिका वडा नम्बर ५ अजम्मरी सामुदायिक वन भित्र ती प्रहरी सालको रूखमा झुन्डिएको अवस्थामा फेला परेका हुन् ।
वडा प्रहरी कार्यालय लमहीले नुवाकोट निवासी अन्दाजी २९ वर्षीय रमेश लामा तामाङ झुन्डिएको अवस्थामा फेला परेको जनाएकाे छ।
वडा प्रहरी कार्यालय लमहीका प्रमुख प्रहरी निरीक्षक राजन पौडेलका अनुसार उनी केही समयअघि मात्रै बारा जिल्लाबाट सरुवा भएर आएका थिए ।
मृतक लामा सशस्त्र प्रहरी बल नम्बर ४१ अर्जुनखोलामा हाजिर हुन आएको बुझिएको उनको भनाइ छ ।
‘उनी लमहीको एभरेस्ट प्लाजा होटलमा बसेका रहेछन् । बिहानै होटलका साहुलाई सोधेर गएको बुझिएको छ ।यसबारे थप अनुसन्धान हुन्छ’ बिएल नेपाली सेवासँग कुराकानी गर्दै उनले भने ।
मृतक लामाको शवलाई पोष्टमार्टमको लागि लमही अस्पतालमा राखिएको छ ।
