कोरोना संक्रमणबाट विदेशमा थप तीन जना नेपालीको निधन भएको छ। यो साता युकेमा एक जना र पोर्चुगलमा दुई जना नेपालीको निधन भएको हो ।
गैरआवासीय नेपाली संघअन्तर्गतको स्वास्थ्य समितिका अनुसार योसँगै विदेशमा कोरोना भाइरसबाट निधन हुनेको संख्या ३ सय १५ पुगेको छ ।
शनिबार साँझसम्म विभिन्न ५० देशमा रहेका ५३ हजार तीन सय ८५ जना नेपालीमा कोरोना संक्रमण देखिएको समितिका संयोजक सञ्जीव सापकोटाले जनाकारी दिए। तीमध्ये ५० हजार ६ सय ५६ जना कोरोनामुक्त भएका छन्। यो कुल संक्रमितको ९४ प्रतिशत हो ।
यस्तै यो साता स्पेन, पोल्यान्ड, जापान, युएई, कुवेत, साउदी अरब, कतारमा रहेका थप नेपालीमा कोरोना संक्रमण देखिएको उनले बताए ।
