गोर्खाली सेनाको गाथामा बन्ने फिल्म ‘गोरखा’ को मुख्य अभिनय जोन अब्राहम गर्दैछन्।
निखिल आडवाणीले गोर्खा रेजिमेन्टको विषयलाई लिएर बनाउन लागेको फिल्मको जानकारी रक्षा मन्त्रालयलाई दिइएको विभिन्न अखबारले जनाएको छ।
फिल्म निर्माणसँग जोडिएका एक व्यक्तिले यस विषयमा जानकारी दिँदै रक्षा मन्त्रालयमा स्विकृतिका लागि निवेदन दिएको बताए।
स्विकृति प्राप्त भएपछि फिल्म निर्माणमा अगाडि जुट्ने निखिलले बताएका छन्। उनले फिल्मको कहानीको सबै डकुमेन्ट रक्षा मन्त्रालयमा पठाएका छन्।
यसअघि करण जौहरले वायुसेनालाई लिएर निर्माण गरेको फिल्म विवादमा आएको थियो। पहिलो महिला विङ कमाण्डरको विषयलाई लिएर निर्माण गरिएको ‘गुञ्जन सक्सेनाः द कारगिल गर्ल’ हालै सार्वजनिक भएको थियो। यस विषयमा वायुसेनाले असन्तुष्टी जाहेर गरेको छ।
यस्तै, केही वर्ष पहिले अक्षय कुमार अभिनित फिल्म ‘एयरलिफ्ट’ को कहानीलाई पनि लिएर विवाद भएको थियो। इमरान हासमीले अभिनय गर्न लागेका ‘क्याप्टेन नवाब’ को कथालाई रक्षा मन्त्रालयले स्विकृति दिन ढिलो गर्दा प्रोजेक्ट नै बन्द गर्नु परेको थियो।
