अखिल म्यान्मा देशीय गोर्खा हिन्दू धार्मिक संघको अठारौँ महासभा,याँगौँ
अ- अ.म्या.दे.गो.हि.धा.सं.को अठारऔँ महासभा
खि-खिचातानी नभै सिद्ध भै दिव्य चम्कियो प्रभा
ल- लड्ने प्रवृत्ति सिद्धेछ योभन्दा अरु के खुशी
म्या-म्यान्माली सभ्य नेपाली गोर्खाली जाति हुन् सुखी
मा- माला सुन्दर पारेर एउटै सूत्रमा उनी
दे- देश विदेशका सारा आफ्ना फूलहरू चुनी
शी-शीतल वरझैँ छायाँ उच्च निकायका तल
य- यदि आश्रय लिन्छौँ ता जिन्दगी बन्छ उज्ज्वल
गो-गोर्खाली टुहुरा छैनौँ हाम्रो स्वामी छ जाँगर
र- रक्तमा वीरता बग्छ रक्षामा नित्य तत्पर
खा-खालि आपसमा प्रेम सद्भाव खूब ल्याइयोस्
हिं-हिंसा, काया र वाचाले मनले सम्म त्यागियोस्
दू- दूरदर्शी थिए पूर्खा र त हाम्रो छ अस्मिता
धा-धार्मिकी सभ्य संस्कारी हुन्थ्यौँ कसरी नत्र ता?
र- रचनात्मक यो संघ बनाऊँ हामिले अझ
मि-मिलेर मात्र यो हुन्छ भनेर सबले बुझ
क- कसैले तोड्न सक्तैन एकजुट भयौँ भने
सं- संघलाई मुटूभित्र सजाएर हिँड्यौँ भने
घ- घर हाम्रो छ यो निजी लगाऊँ यसमा कला
को-कोशिसले सबै हुन्छ थप्दै जाऊँ तला तला
अ- अस्त व्यस्त नहोस् बन्धू सहयोग गरौँ अनि
ठा- ठानौँ मेरो पनि पूरा जिम्मेबारी छ है भनी
रौँ- रौँ ठडिने गरी सारा विश्वको, काम गर्नु छ
म- मरिन्छ मर्न ता, केही गरेर मात्र मर्नु छ
हा-'हाम्रो'को भाव राखेर 'मेरो'को स्वार्थ छोड्दिनू
स- सत्यको मार्गमा विघ्न हाल्ने विषय तोड्दिनू
भा-भारी उत्साहका साथ उर्लिई जन-सागर
ले- लेख्यो भविष्यको भाग्य,हेर्न बाँकी छ त्यो तर।
ज्ञातव्य- यस सङ्घको नाम परिवर्तन गरिएको छ।
-कौशिक
