बाराको कलैयास्थित मोतीबागमा आगलागी हुँदा सात वटा फुसको घर जलेर नष्ट भएको छ ।

बाराका डीएसपी गौतम मिश्रका अनुसार कलैया उपमहानगरपालिका ३ मोतीबागमा शुक्रबार अपरान्ह आगलागी हुँदा स्थानीय बेलदार माझी, बच्चा माझी, सन्तोष माझी, मनु माझी, महादेव माझी, बिकल माझी र खेनारी माझीको खरले छाएको घर जलेर नष्ट भएको हो ।

बेलदार माझीको खाना पकाउने चुलोबाट आगलागी हुँदा सात घर जलेर क्षति भएको उहाले बताए । आगलागीबाट भण्डारण गरी राखेको अन्नपात, भाँडावर्तन, लत्ताकपडा गरी करिब एक लाख ५० हजार मूल्य बराबरको धनमाल जलेर नष्ट भएको गौतमले बताए ।

प्रहरीको सहयोगमा कलैया उपमहानगरपालिकाको दमकलले करिब आधा घण्टाको समयमा आगलागी नियन्त्रणमा लिएको जनाइएको छ ।