कोभिड–१९ (नोबल कोरोना भाइरस) का कारण देश गत चैत १२ गतेदेखि बन्दाबन्दी (लकडाउन) मा छ।

थप कोरोना संक्रमण नफैलियोस् भन्दै सरकारले सबै अन्तर्राष्ट्रिय नाकाहरू बन्द गरेको छ।

स्थलमार्गका नेपाल-भारत र नेपाल-चीनका सबै नाका बन्द छन्। एकमात्र अन्तर्राष्ट्रिय विमानस्थल पनि बन्द गरिएको छ।

नेपालले विदेशबाट आउने/जाने हवाइ उडानहरू बन्द गरे पनि त्रिभुवन अन्तर्राष्ट्रिय विमानस्थलबाट आजसम्म (२०७७ जेठ १६ गते) अर्थात  बन्दाबन्दीको ६७ औं दिनसम्म कार्गो र प्यासेन्जर बोकेर चार्टड फ्लाइट ९६ वटा गरेको छ ।

‘लकडान (बन्दाबन्दी) को अवधिमा त्रिभुवन अन्तर्राष्ट्रिय विमानस्थलबाट आजसम्म ९६ वटा अन्तर्राष्ट्रिय फ्लाइट भएका छन्’, त्रिभुवन अन्तर्राराष्ट्रिय विमानस्थलका निर्देशक सागर आर्चायले भने,‘अहिलेसम्मका फ्लाइटहरु धेरै कार्गो र चार्टड फ्लाइटहरू छन्।’

अधिकांश चार्टड फ्लाइटमा नेपालस्थित विदेशका राजदूतावासले आफ्ना नागरिकलाई आफ्नो देश फर्काएको निर्देशक आर्चायले बताए ।

जर्मन राजदूतावासरले १२ सय ३ जना आफ्ना नागरिक फिर्ता लगेको छ। यस्तै जापानले १५ सय १६ जना आफ्ना नागरिक फिर्ता लगेको छ। अमेरिकाले ९ सय ८ जना, फ्रान्सले ६ सय ८ जना, अष्ट्रेलिया २ सय ५७ जना, मलेसिया ३३, रसिया १ सय १० जना, भुटान १४ जना, क्यानडा २ सय ७ जना, इण्डोनेसिया २ सय २८, चीनले ३ सय ३६ जना र अन्य देशले सानो संख्यामा गरि ७ हजार ३५० जना विदेशी र नेपाली नागरिक बाहिरिएको त्रिभुवन अन्तर्राष्ट्रिय विमानस्थलको अध्यागमन विभागले जनाएको छ।