भारतलगायतका ठाउँबाट नेपाली धमाधम फर्किन थालेपछि उनीहरुलाई क्वारेन्टाइनमा राख्ने, खाना र स्वास्थ्य जाँचलगायतको व्यवस्थापन गर्ने चुनौती देखिन थालेको छ।
सुदूरपश्चिम प्रदेशको गड्डाचौकी र गौरीफन्टा सीमानाका हुँदै भारतबाट नेपाली भित्रिनेक्रम पछिल्ला दिनमा बढेको छ। यसबाहेक नेपालका कपिलवस्तु, सप्तरी, सिराहालगायतका जिल्लाबाट कैलाली फर्किने पनि बढ्न थालेका छन्। गएको तीन दिनमा भारतबाट गौरीफन्टा नाका हुँदै भित्रिएकालाई क्वारेन्टाइनका रुपमा प्रयोग गरिएका विद्यालयमा राखिएको कैलालीको चुरे गाउँपालिकाका अध्यक्ष धनबहादुर रोक्कामगरले बताए।
स्वास्थ्य सामग्रीको अभावमा उनीहरुको स्वास्थ्यको नमूना जाँच कहिले गर्ने कसरी गर्ने भन्ने चुनौती स्थानीय तहलाई देखिएको उनले बताए। कोरोनाको सङ्कटसँगै कैलालीका स्थानीय तहले कतिपय विद्यालयलाई क्वारेन्टाइनका रुपमा प्रयोग गरिरहेका छन्। जिल्लाको बर्दगोरिया गाउँपालिकामा मात्रै केही दिनयता नेपालका कपिलवस्तु, सप्तरी, दाङका साथै भारतबाटसमेत गरी झण्डै ६० जना फर्किएका छन्।
धनगढी उपमहानगरपालिका क्षेत्रमा क्वारेन्टाइनका रुपमा प्रयोग भएका विद्यालयका साथै कैलाली बहुमुखी क्याम्पसमा फर्किनेलाई राख्न थालिएको छ। उद्धार कार्यमा नगरप्रमुख नृपबहादुर ओड आफैँ खटिएका छन्। ‘बुधबार राति अबेरसम्म नाकामै बसेर सीमामा अलपत्र परेका नेपालीको उद्धार गर्यौं’, उनले भने। गाउँपालिका स्तरमा कोरोनाको शङ्कास्पद व्यक्तिको आरडिटी किटमार्फत स्वास्थ्यको नमूना जाँच हुने गरेकामा अधिकांश गाउँपालिकामा यो किटको अभाव देखिएको बताइएको छ।
प्रदेशका सामाजिक विकासमन्त्री कृष्णराज सुवेदीले आरडिटी जाँचका लागि देखिएको किटको अभावको पूर्ति गर्न पहल गरिएको बताए। ‘किट उपलब्ध गराइदिन सङ्घीय सरकारलाई आग्रह गरेका छौँ’, उनले भने, ‘सङ्घीय सरकारले किट प्राप्त गरेपछि भागमा पर्ने किट हामी पाउँछौँ।’
सरकारले गरेको लकडाउनको पूर्ण परिपालना गर्नुपर्छ भन्नेमा आफू प्रतिबद्ध रहेको मन्त्री सुवेदीले बताउनुभयो। कामको खोजीमा बाहिरिएका सङ्क्रमित क्षेत्रबाट फर्किन थालेपछि सङ्क्रमण फैलिने हो कि भन्ने त्रास स्थानीयमा देखिन थालेको छ।
सीमा नाकाबाट उद्धार गरिँदै :
कोरोना भाईरसको प्रभावले भारतमा रोजगारी गुमाएपछि स्वदेश फर्किन सीमा नाका सम्म पुगेका मजदुरहरुको जिल्ला प्रशासन कार्यालय कैलालीको समन्वयमा उद्दारको काम भईरहेको हो। गौरीफन्टा नाकाबाट सात बजेसम्म दुई हजारलाई भित्र्याईएको जिल्ला प्रशासन कार्यालय कैलालीका सूचना अधिकारी शिवराज जोशीले बताए। अझै उद्धारको क्रम भने जारी रहेको उनले बताए।
यस्तै अहिलेसम्म चार सय ५० जनाको र्यापिड टेस्ट गरिएको छ। सीमामा स्थापना गरिएको स्वास्थ्य सहायता कक्षले दिएको जानकारी अनुसार चार सय ५० जनाको र्यापिड टेस्ट गर्दा ११ जनामा एन्टिबडी देखाएको छ।
यसअघि बुधबार पनि गौरीफन्टा नाकाबाट साढे ८ सय मजदुरलाई स्थानीय प्रशासनको समन्वयमा उद्दार गरिएको थियो। बुधबार उनीहरुको सामान्य तापक्रम परीक्षण गरेर भित्र्याईएकोमा आज भने सीमानाकामै र्यापिड टेस्ट भईरहेको हो। सुदूरपश्चिम प्रदेश सरकारले सीमा क्षेत्रमै र्यापिड टेस्ट गर्ने व्यवस्था मिलाएको जिल्ला प्रशासन कार्यालय कैलालीले जनाएको छ।
धनगढी भित्र्याईएका नेपालीलाई आजै सम्बन्धित पालिकासम्म पुगाउने तयारी पनि गरिएको छ। त्यसका लागि विभिन्न पालिकाहरुले गाडीको व्यवस्थापन समेत गरेको जनाएका छन्। आज गन्तव्यमा पठाउन नसकिएका नेपालीलाई भने धनगढीकै क्वारेन्टाइनमा राखिने स्थानीय प्रशासनले जनाएको छ।
रासस
.jpg)
