कोशी अस्पताल कोभिड १९ उपचार केन्द्रमा उपचाररत ३१ जना मध्ये ६ कोरोना संक्रमित निको भएका छन्।
प्रदेश एक सामाजिक विकास मन्त्रालयले उनीहरुको दोस्रो रिपोर्ट पनि नेगेटिभ आएपछि आज बुधबार डिस्चार्ज गरिने जनाएको छ।
सामाजिक विकास मन्त्री जीवन घिमिरेले निको भएका ६ जनालाई आज बिहान ८ वजे डिस्चार्ज गरिने भएको बताए।
डिस्चार्ज हुने तयारीमा रहेका सबै भारतीय नागरिक हुन्। डिस्चार्ज हुनेमा ३० वर्षीय अनुस जैदी, २९ वर्षीय मोहम्मद अजिज, २८ वर्षीय मोहम्मद जावेद, २१ वर्षीय मोहम्मद अहमद साहेव, ३४ वर्षीय मोहम्मद अजिरवान र २६ वर्षीय मोहम्वद राशिद रहेका छन्।
गत वैशाख ५ र ६ गते उदयपुरबाट ल्याईएका १३ जनामध्ये ६ जनाको रिपोर्ट लगातार दुई पटकसम्म नेगेटिभ आएपछि डिस्चार्ज गर्न लागिएको उनले बताए।
कोशी अस्पतालकी मेडिकल सुपरिटेन्डेन्ट डा। संगिता मिश्राले उनीहरुसँगै अस्पतालमा उपचाररत अन्यको अवस्था समेत सामान्य रहेको बताइन्।
तर डिस्चार्ज हुनेहरुलाई थप केही दिन विराटनगरस्थित एक मस्जिदमा निर्माण गरिएको क्वारेन्टिनमा राखिने छ।
विराटनगरको कोशी कोभिड १९ उपचार केन्द्रमा उदयपुरका २८ सहित ३१ जना उपचाररत थिए। जसमध्ये १२ जना भारतीय हुन् भने बाँकी नेपालीहरु हुन्।
