सुदूरपश्चिम प्रदेशको अछाम घर भइ भारतको मुम्बईमा बस्दै आएको एक परिवारका ८ जना कोरोना भाइरसकाे संक्रमणबाट मुक्त भएका छन्।
लामो समयदेखि मुम्बईमा बस्दै आएका अछाम चौरपाटी गाउँपालिका–५ लुंग्राका चेतमान खड्काको परिवारका ८ जनामा कोरोना भाइरस संक्रमण देखिएको थियो।
उनका दुई छोरी, छोरा, पत्नी, भाइ र भतिजा गरी ११ जनालाई अस्पताल भर्ना गरिएको र परीक्षणका क्रममा आठ जनामा संक्रमण देखिएको थियो।
चेतमान खड्काले शुक्रबार सामाजिक सञ्जालमार्फत २५ दिन अस्पतालको कष्ट झेलेर कोरोना भाइरसलाई जितेर भइ घर फर्कन पाउदाँ खुशी लागेको बताएका छन्।
‘कोरोनालाई पराजित गर्दै सम्पूर्ण परिवार एकसाथ घरमा भेटहुँदा निकै खुसी लागेको छ। मेरो सबै परिवारले हिम्मत र आत्मविश्वासका कारण कोरोनालाई जित्यौँ ।’ अस्पताल भर्ना हुँदा यसरी निको भएर भेट हुन्छ भन्ने लागेको थिएन,’ उनले लेखेका छन्।
