नेपालगञ्जका मुसलमान धर्मगुरुहरुले विश्वव्यापी रुपमा फैलिएको कोभिड–१९ को सङ्क्रमण रोकथामका लागि परम्परागत तथा धार्मिक कार्य घरमै गर्न आग्रह गरेका छन्।
मुुसलमान समुदायको पवित्र पर्व रमजानका पूर्वसन्ध्यामा नेपालगञ्जका धर्मगुरु, मौलाना र अगुवाले जुमाको नमाज, पाँच पटकको नमाज र तराविहको नमाजसमेत घरमै पढ्ने व्यवस्था मिलाउन सार्वजनिक अनुरोध गरेका हुन्।
केन्द्रीय हज कमिटीका पूर्वअध्यक्ष एवम् धर्मगुरु मौलाना अव्दुलजव्वार मञ्जरीले केही दिनमै शुरु हुने रमजान पर्वका क्रममा हुन सक्ने पारिवारिक भेटघाटमा पनि सीमा दूरी कायम गर्दै सचेतना अपनाउन आग्रह गरे।
मुसलमान समुदायका केही व्यक्तिमा कोरोनाको सङ्क्रमण देखिएसँगै समुदाय लक्षित सार्वजनिक टीकटिप्पणीप्रति पनि सचेत रहन आह्वान गर्दै मौलानाहरुले समुदायमा रहेका सम्भावित कोरोना सङ्क्रमित र आशङ्कितको पहिचान गरी स्वास्थ्य परीक्षण गर्न गराउन आह्वान गरेको संविधानसभा सदस्य भोला सिद्दिकीले बताए।
नेपालगञ्जमा बिहीबार आयोजित बैठकमा जामा मस्जिद नेपालगञ्जका मुुफ्ती कैफुल वरा खाँ मिसवाही, मदरसा व्यवस्थापन समितिका पूर्वअध्यक्ष मौलानामन्सुर अहमद, जामा मस्जिदका महासचिव इरफान सिद्दिकी, मदरसा गौसियाका सचिव मोहम्मद हारुन, मुस्लिम सङ्गठन नेपालका सहसंयोजक अतहरहुसेन फारुकीलगायतले कोरोना नियन्त्रणमा जिम्मेवारीपूर्ण भूमिका निर्वाह गर्न तथा धार्मिक एवं सामाजिक सद्भाव सुदृढ गर्न सामूहिक आग्रह गरे।
.jpg)
