मुस्ताङको थासाङ गाउँपालिका ४ घाँसाको घैपुमा सोमबार सुख्खा पहिरो खस्दा एक जनाको ज्यान गएको छ।

 बेनी–जोमसोम–कोरला सडकखण्ड अन्तर्गत  घैपुमा सडक खनिरहेको अवस्थामा सडकमाथिबाट खसेको सुख्खा पहिरोले एक्स्काभेटर अपरेटरको ज्यान गएको हो। 

ज्यान जानेमा सिन्धुपाल्चोक घर भएका अर्जुन दाहाल रहेको मुस्ताङका सहायक प्रमुख जिल्ला अधिकारी घनश्याम गौतमले जानकारी दिए।

सडक सफा गरिरहेको एक्स्काभेटर खोलामा खस्दा दाहालको एक्स्काभेटरको चेनले च्यापिएर ज्यान गएको हो।  

एक्स्काभेटर सडकबाट झण्डै तीन सय मिटर तल घैपुखोलामा खसेको जिल्ला प्रशासन कार्यालय मुस्ताङले जनाएको छ। पहिरोले बसलाई समेत क्षति पुर्‍याएको छ। 

घटना भएलगत्तै नेपाल प्रहरी, सशस्त्र, नेपाली सेना र स्थानीयवासी घटनास्थल पुगेर उद्धारको प्रयास गरेका थिए।