अमेरिकी राष्ट्रपति डोनल्ड ट्रम्पले अर्को सातादेखि अमेरिकाबाट दशौं लाख कागजपत्रविहिनहरुलाई देशनिकाला गरिने चेतावनी दिएर २०२० का लागि राष्ट्रपति निर्वाचन अभियान सुरू गरेका छन् ।
फ्लोरिडाको ओरलाण्डोमा श्रीमती मेलानियाले परिचय गराएपछि सुरू भएको चुनावी अभियानमा राष्ट्रपति ट्रम्पले पुरानै मुद्दाहरू अघि सारेर चुनावी क्याम्पेन सुरू गरे । उनले वैधानिक आप्रवासीमाथि कडा प्रहार गर्दै डेमोक्रेटहरूलाई अमेरिका र अमेरिकी जनताको शत्रुका रूपमा प्रस्तुत गरे । उनले भाषणको क्रममा सन् २०१६ की प्रतिस्पर्धी हिलारी क्लिन्टनलाई पनि बाँकि छोडेनन् ।
राष्ट्रपति निर्वाचन अभियान सुरू गर्ने पूर्वसन्ध्यामा ट्विटमा लेखे- अर्को सातादेखि आइसले अमेरिकामा रहेका दशौं लाख अवैधानिक आप्रवासीलाई देशनिकाला गर्ने छ । उनीहरू जति छिटो आएका थिए, त्यति नै छिटो देशनिकाला गरिने छन् ।'
झण्डै १० लाख कागजपत्रविहिन आप्रवासी देशनिकालाको आदेश पाएर पनि अमेरिकामा नै बसिरहेको बताइन्छ । राष्ट्रपति ट्रम्प उनीहरुलाई पक्राउ गरेर देशनिकाला गर्ने योजनामा रहेका छन् ।
उनी यही मुद्दालाई अमेरिकी मतदाताबीच स्थापित गरेर सन् २०२० को चुनाव जित्ने योजनामा छन् ।
राष्ट्रपति ट्रम्पको यो योजनाबाट एकहजार चार ९३ जना नेपाली पनि प्रभावित हुने तथ्यांक बाहिरिएको छ । तर, न्युयोर्कका एक नेपालीमूलका कानून व्यवसायी भन्छन्- 'यो संख्याको झण्डै ७५ प्रतिशत टीपीएसबाट सुरक्षित भैसकेको छ । यदि राष्ट्रपतिले यो योजना कार्यान्वयन गरे नै भने पनि थोरै संख्यामा नेपाली यसबाट प्रभावित हुनेछन् ।'
अवैधरूपमा अमेरिका बस्ने आप्रवासीलाई लखेटेर चुनाब जित्ने उनकाे याे रणनीति र राजनीतिक अभियानले कस्ताे परिणाम देला ? उनी अझै छ वर्ष याे देशकाे सत्ताकाे साँचाे हातमा लिएर बस्लान् कि दुई वर्षमै ह्वाइट हाउसबा बाहिरेलान् ? याे एक पेचिलाे प्रश्न बनेको छ ।
