क्रिष्टियानो रोनाल्डोको सपना चकनाचुर पार्दै डच क्लब अजाक्स च्याम्पियन्स लिगको अन्तिम चारमा पुगेको छ। अजाक्सले मंगलबार राति भएको क्वाटरफाइनलको दोस्रो लेगमा इटालियन क्लब युभेन्टसलाई २-१ ले पराजित गर्यो। यो जीतसँगै समग्रमा ३-२ को जीत निकालेर अजाक्स सेमिफाइनलमा मात्र पुगेन, इटालियन क्लब युभेन्टसलाई प्रतियोगिताबाटै छुट्टी पनि गरिदियो।
घरेलु मैदानमा भएको खेलमा रोनाल्डोले २८औँ मिनेटमा रोनाल्डोले गोल गर्दै युभेन्टसलाई अग्रता दिलाएका थिए। त्यसको ६ मिनेटपछि नै ३४ औँ मिनेटमा अजाक्सका डुनी भान डी बीकले गोल गरेर खेल बराबरीमा ल्याए। ६७औँ मिनेटमा कप्तान माथिज्सडी लिग्टको गोलले अग्रता लिएको अजाक्सका लागि त्यही नै विजयी गोल भयो।
यो हारसँगै तेस्रो क्लबबाट छैटौँ तथा लगातार चौथो सिजन युरोपियन च्याम्पियन बन्ने क्रिष्टियानो रोनाल्डोको सपना चकनाचुर भएको छ।
गएको सिजन रियल म्याड्रिडबाट लगातार तेस्रो तथा समग्रमा चौथो पटक उपाधि जितेपछि रोनाल्डो यो सिजन युभेन्टसमा पुगेका थिए। उनले यसअघि म्यानचेस्टर युनाइटेडबाट पनि एक पटक च्याम्पियन्स लिगको उपाधि जितिसकेका छन्।
