हाम्रो प्रदेशमा स्वागत छ माननीय मुख्यमन्त्रीज्यू ! यतै आएर बस्नुस् न ।’
आफ्नो कार्यकक्षतर्फ इसारा गर्दै प्रदेश २ का मुख्यमन्त्री मोहम्मद लालबाबु राउतले प्रदेश १ का मुख्यमन्त्री शेरधन राईलाई स्वागतभाव दर्शाए । मुख्यमन्त्री भएपछि राई पहिलो पटक औपचारिक भ्रमणमा सोमबार प्रदेश २ को अस्थायी राजधानी जनकपुर पुगेका थिए ।
‘‘तपाईंले त राजधानी पनि टुंग्याउनु भएछ ?’’ राउतले सोधे ।
‘‘हो त । सबैको सहमति जुटाएर सर्वसम्मतिमै टुंगोमा पुगियो,’’ राईले जवाफ दिए ।
‘‘तपाईंको ‘आइडिया’ मन पर्यो, बृहत् विराट भन्ने । हामी पनि बर्दिवाससमेतलाई जोडेर बृहत् जनकपुरको अवधारणामा जाने हो कि भन्ने सोच्दैछौं (केही क्षण हाँसो),” राउतले भने ।
