अजित बराललाई करिब दुई महिनादेखि भ्याइनभ्याइ छ। हरेक वर्ष नेपाल साहित्य महोत्सवको चटारो बढेसँगै उनको दैनिकी व्यस्त हुन्छ।
महोत्सवको आठौं संस्करण यही मंसिर २७ देखि ३० सम्म पोखरामा हुँदैछ। बुक वर्म फाउन्डेसनले आठ वर्षदेखि गर्दै आएको महोत्सवका आयोजकमध्ये एक हुन् उनी।
गत अगस्टमै पत्रकार सम्मेलन भएपछि विषय र वक्ता चयन, उनीहरूको बसोबास र आउजाउ व्यवस्थापनका काममा तीन महिना बितिसकेको छ। मिडिया, स्वयंसेवी र प्राविधिक व्यवस्थापनको चिन्ता छँदैछ।
कार्यक्रममा सहभागी विज्ञ, लेखक र पाठकका सकारात्मक प्रतिक्रिया, आफन्त र साथीहरूको हौसलाले भने उनलाई उत्साह दिन्छ। यही उत्साहले महोत्सवको अर्को संस्करण सफल बनाउन फेरि कम्मर कसेर लागेका छन्।
