सुनसरीबाट प्रहरीले खैरो हेरोइनसहित दुईजनालाई पक्राउ गरेको छ। पक्राउ पर्नेहरुमा संखुवासभाको भोटखोला–१ बस्ने २८ वर्षीय साङबु शेर्पा र धरान–१९ चौकीबारी बस्ने ३७ वर्षीय सुरज राई रहेका छन्।
इलाका प्रहरी कार्यालय धरानका डीएसपी ढुण्डीराज न्यौपानेका अनुसार शेर्पालाई मंसिर २३ गते साँझ धरान–८ स्थित तीनकुने चेक पोष्टबाट र राईलाई धरान–२ भानुचोकबाट पक्राउ गरिएको हो।
शेर्पा र राई खैरो हिरोइन र लागूऔषध विक्री वितरणका लागि ओसारपसारमा संलग्न रहेको सुराकी पाएपछि खोजतलास गर्दा बेग्ला बेग्लै स्थानबाट पक्राउ गरिएको प्रहरीले जनाएको छ।
प्रहरीले शेर्पाको साथबाट ८० मिलीग्राम हिरोइन र राईको साथबाट २० फाइल नाइट्रोजेपाम बरामद गरिएको जनाएको छ । उनीहरुलाई मंगलबार नै जिल्ला अदालत इनरुवाबाट म्याद थप गरी अनुसन्धान सुरु गरिएको डीएसपी न्यौपानेले बताए ।
