एसीसी इमर्जिङ एसिया कप क्रिकेटमा नेपालले आज (सोमबार) समूह चरणको अन्तिम खेल खेल्दैछ।
प्रतियोगिताको तेस्रो तथा अन्तिम खेलमा नेपालले आयोजक बंगलादेशसंग प्रतिस्पर्धा गर्न लागेको हो।खेल नेपाली समय अनुसार बिहान पौने ९ बजे सुरु हुनेछ ।
समुह ’बी’ मा रहेको बंगलादेशले दुई खेल जित हात पार्दै समूहको शीर्ष स्थानमा छ। नेपाल एकमा जित र एकमा हार ब्यहोर्दै तालिकाको तेस्रो स्थानमा छ ।
अघिल्लो चरण प्रवेशको लागि नेपाललाई बंगलादेशविरुद्ध जित निकाल्नै पर्ने दबाब छ।
ढाकामा बिहिबार भएको पहिलो खेलमा नेपाल भारतको यू–२३ टिमसँग ७ विकेटले पराजित भएको थियो।
यस्तै शनिबार दोस्रो खेलमा हङकङलाई ४० रनले पराजित गरेको थियो।
बंगलादेशले पहिलो खेलमा हङकङलाई ९ तथा भारतलाई ६ विकेटले पराजित गरेको थियो।
प्रतियोगितामा युएईले नाम फिर्ता लिएपछि नेपालले खेल्ने मौका पाएको थियो।
समूहको शीर्ष दुई टिमले सेमिफाईनल खेल्नेछन्।
