नेपाल घुम्न आएका विदेशीले आफ्नो देश फर्कने बेला सम्झनाको चिनो के लैजालान्?
झन्डै दुई दशकदेखि लाजिम्पाटमा ग्यालरी चलाइरहेका नरबहादुर विकको अनुभवले भन्छ– हिमाल, नेपाल आउने धेरै पर्यटकको पहिलो रोजाइमा हिमालको चित्र पर्छ। धेरैले चिनोका रुपमा पनि त्यहीँको परिवेश उतारिएको चित्र लैजान्छन्।
यसबाहेक पहाडी परिवेश र बुद्धका चित्र पर्यटकका प्राथमिक रोजाइ हुन्। पर्यटकका यस्तै रोजाइ अनुसारका चित्र बनाउनु कलाकार नरबहादुर विकको नियमित काम हो। उनको ग्यालरी हिमाल र पहाडका क्यानभासले भरिएका छन्। ललितकला क्याम्पसबाट मूर्तिकलामा स्नातकोत्तर गरे पनि उनको काम चित्रकलामै केन्द्रित छ।
