आगलागी हुँदा काठमाडौं महानगरपालिका–१३ टंकेश्वरमा एक वृद्धाको मृत्यु भएको छ ।
चुरोट सल्काउने क्रममा पर्दामा आगो सल्किँदा सिन्धुपाल्चोक सानोसिरुवारी नगरपालिका घर भएकी ७८ वर्षीया धनमाया श्रेष्ठको आगलागीमा परी मंगलबार राति मृत्यु भएको हो ।
आगलागीमा जलेर गम्भीर घाइते भएकी उनको शहीद मेमोरियल अस्पताल कलंकीमा उपचारको क्रममा मृत्यु भएको प्रहरीले जानकारी दिएको छ ।
यस्तै दैलेखको नौमुले गाउँपालिका–६ गोगनपानी बस्ने प्रेम बहादुर थापाको घरमा दीपावलीको लागि मैनबत्ती बाल्ने क्रममा मंगलबार राति आगलागी हुँदा उक्त आगोमा जलेर गणेश बहादुर थापाकी ४ वर्षीया छोरी ईश्वरी थापाको मृत्यु भएको छ । आगलागीबाट घर पूर्णरुपमा जलेर नष्ट भएको प्रहरीले जनाएको छ ।
उता मोरङको केराबारी गाउँपालिका–१ सेल्डिङ मंगलबार राति आगलागी हुँदा ४९ वर्षीया हस्तमाया मगरको जलेर मृत्यु भएको छ । आगलागीबाट घर, घरभित्रका सम्पूर्ण सरसामान जलेर करिब ३ लाख ५० हजार रुपैयाँ बराबरको धनमाल नष्ट भएको प्रहरीले जनाएको छ ।
यस सम्बन्धमा स्थानीय प्रहरीले थप अनुसन्धान गरिरहेको छ ।
