प्रधानमन्त्री केपी शर्मा ओलीले राजनीति भ्रष्टाचार र पैसा कमाउनको लागि नभइ इमानको राजनीति गर्ने बताएका छन् ।

आइतबार बालुवाटारमा आयोजित मदन भण्डारी फाउण्डेसनको चौथो राष्ट्रिय सम्मेलनमा बोल्दै उनले इमान, सत्य र सामाजिक परिवर्तनको लागि राजनीति गरेको बताएका हुन्।

‘हामी सचेत छौं। हामीले इमानको राजनीति गर्ने हो, सत्यको राजनीति गर्ने हो। भ्रष्टाचारको राजनीति हैन, पैसा कमाउनको लागि, पदको दुरुपयोग गर्नको लागि, आफन्तको बन्दोबस्त गर्नको लागि, आफ्ना मान्छे जागिर खुवाउनको लागि हैन। सामाजिक परिवर्तनको लागि प्रयास गरिरहेका छौं भन्ने कुरा हामीले कहिलेपनि हेक्का छोड्नुहुँदैन,’ उनले भने।

मदन भण्डारीलाई सम्झँदै उनले मदन भण्डारी फाउण्डेशनले जनताको बहुदलीय जनवादलाई प्रक्रिदै ढृणताका साथ अघि बढ्ने बताए। उनले फाउण्डेशनले मदन भण्डारीको विचारलाई जोगाइराख्ने बताए।