गाजामा इजरायली आक्रमण र क्षेत्रीय देशहरूमाथि गरिएको धम्कीविरुद्ध शुक्रबार यमनको राजधानी साना तथा अन्य क्षेत्रमा हजारौं मानिसहरूले प्रदर्शन गरेका छन्।

प्रदर्शनकारीहरूले गाजामा इजरायलद्वारा गरिएको नरसंहार, जातीय सफाया, भोकमरी, विस्थापन र विनाशलाई कडा रूपमा निन्दा गरेका छन् र यसलाई अन्तर्राष्ट्रिय कानुनको गम्भीर उल्लङ्घन भएको बताएका छन्।

उनीहरूले संयुक्त राष्ट्र सुरक्षा परिषदमा अमेरिका इजरायलप्रति पक्षपाती रहेको र शान्ति स्थापनाका प्रस्तावहरूलाई रोक्न बारम्बार भिटो शक्ति प्रयोग गरेकोमा पनि आलोचना गरेका छन्।

यमनको हुथी समूहका राष्ट्रिय रेडियो तथा टेलिभिजनका महाप्रबन्धक अब्दुलरहमान अल–अहनोमीले भने, ‘साना र यमनमाथि बारम्बार इजरायली आक्रमण भए पनि, कतार, प्यालेस्टाइन र छिमेकी देशहरूमा इजरायली उल्लङ्घन भए पनि यमनका जनता आफ्नो स्थितिमा अडिग छन्। प्यालेस्टिनी जनतालाई समर्थन जारी राख्छन् र प्यालेस्टाइनसँग ऐक्यबद्धतामा सैन्य गतिविधि जारी राख्नेछन्।’

इजरायलले हालै हुथी नियन्त्रण क्षेत्रहरूमा हवाई आक्रमण तीव्र बनाएको छ। सैनिक स्थल मात्र नभइ बन्दरगाह, विद्युत् स्टेसन, इन्धन गोदाम र अन्य पूर्वाधारलाई पनि लक्षित गरेको छ। सञ्चार माध्यमहरू पनि आक्रमणबाट प्रभावित भएका छन्। सेप्टेम्बर १० मा भएको एक हवाई आक्रमणमा ३२ जना पत्रकारको मृत्यु भएको बताइएको छ।

शुक्रबारको प्रदर्शनमा हुथी नेताहरू र सहभागीहरूले गाजास्थित प्यालेस्टिनी जनतालाई समर्थन जारी राख्ने र इजरायलले गाजामा आफ्नो सैन्य अभियान नरोकेसम्म ड्रोन तथा मिसाइल हमला जारी राख्ने प्रतिबद्धता व्यक्त गरेका छन्।