तुर्कमेनिस्तानको तटीय सहर अवाजामा रहेका प्रधानमन्त्री केपी शर्मा ओली आज विभिन्न कार्यक्रमहरूमा सहभागी हुँदैछन्। नेपाली प्रतिनिधि मण्डलको नेतृत्व गरेर प्रधानमन्त्री ओली भूपरिवेष्टित विकासशील राष्ट्रहरू (एलएलडिसी)को तेस्रो संयुक्त राष्ट्रसङ्घीय सम्मेलनमा सहभागी हुन त्यहाँ पुगेका हुन्। 

आज हुने ‘जलवायु परिवर्तनका कारण सिर्जित प्रकोपमा भूपरिवेष्ठित विकासशील देशहरुले अवलम्बन गर्नुपर्ने अनुकूलन क्षमताको अभिवृद्धि र लचिलोपन’का विषयमा हुने बहसमा आज ओलीले सम्बोधन गर्नेछन्। 

यस्तै, भूपरिवेष्ठित विकासशील देशहरूका लागि व्यापार तथा वाणिज्यको  सहजता र क्षेत्रीय सहकार्य विषयक छलफल सत्र ओलीकै सहअध्यक्षतामा हुनेछ। 

आजै उनले काजकस्तान, अजरवैजान, ताजकस्तानलगायतका राष्ट्र प्रमुखहरूसँग भेटघाट पनि गर्ने कार्यक्रम छ। 

३२ भूपरिवेष्टित विकासशील राष्ट्रका प्रमुख तथा सरकार प्रमुखहरू सहभागी यो सम्मेलनमा समुद्रमा प्रत्यक्ष क्षेत्रीय पहुँचको अभाव र विश्व बजारबाट टाढा रहेका देशहरूका समस्याका बारेमा छलफल भइरहेको छ। 

प्रधानमन्त्री ओली नेतृत्वको भ्रमण टोलीमा श्रीमती राधिका शाक्य, प्रमुख सल्लाहकार विष्णुप्रसाद रिमाल, प्रतिनिधिसभाका सदस्य सूर्यबहादुर थापा क्षेत्री, प्रधानमन्त्रीका प्रमुख स्वकीय सचिव राजेश बज्राचार्य, निजी चिकित्सक प्रा.डा. दिव्यासिंह शाह, परराष्ट्र मन्त्रालयका सचिव अमृतबहादुर राईलगायत अरु पनि उच्चपदस्थ सरकारी अधिकारी छन्।