सूचना तथा सञ्चार प्रविधिमन्त्री पृथ्वीसुब्बा गुरुङले धेरै अनलाइन मिडियाहरु अराजक बनेकाले नियन्त्रण गर्न जरुरी भएको बताएका छन्।

नेपाल पत्रकार महासङ्घ कास्कीका नवनिर्वाचित पदाधिकारीहरुको सपथ तथा पदभार ग्रहण समारोहमा बोल्दै उनले ऐन, कानुन नमान्ने र पत्रकारिताका मान्यताहरुको खिल्ली उडाउने त्यस्ता अनलाइनहरुलाई नियमनभन्दा नियन्त्रण जरुरी भएको बताएका हुन्।

‘अनलाइन मिडियाहरुको प्रभावकारी नियमनका लागि विधेयक बनेको छ। यही हिउँदे अधिवेशनबाट त्यसलाई पारित गर्ने तयारी छ। संसद तत्काल बोलाउने अवस्था नभएमा अध्यादेशबाट समेत यो विधेयक ल्याउनुपर्ने देखिएको छ’, मन्त्री गुरुङले भने।

उनले आमसञ्चार विधेयकको डाफ्ट बन्दै गरेकाले देशैभरका पत्रकार र सरोकारवालाबाट त्यसमा राख्नुपर्ने विषयबारे सुझाव दिन आग्रह गरे।

नेपाल सरकारका प्रवक्तसमेत रहेका उनले सरकार बन्नेबित्तिकै सरकार ढल्छ भनी अफवाह फैलाउन सुरु गरिएको भन्दै उनले देशलाई समृद्धिको बाटोमा लैजान यो सरकारको विकल्प नभएकोमा बताए।