झापाको दमक नगरपालिका–१० स्थित सेतुमारी पुलमुनि बोराभित्र प्याक गरिएको अवस्थामा एक महिलाको शव फेला परेको छ।

प्रहरीका अनुसार अन्दाजी २५ वर्ष उमेरकी देखिने ती महिलाको शव शनिबार फेला परेको हो। घटनास्थलमा पुगेको प्रहरीले शवलाई नियन्त्रणमा लिएर अनुसन्धान अघि बढाएको जनाएको छ।

हालसम्म मृतक महिलाको पहिचान खुल्न नसकेको प्रहरीले जनाएको छ। तर, उनको हातमा रहेको विशिष्ट ट्याटु पहिचानको महत्वपूर्ण आधार बन्न सक्ने अनुमान गरिएको छ। सोही ट्याटुका आधारमा मृतकको परिचय खुलाउने प्रयास भइरहेको प्रहरीले जनाएको छ।

इलाका प्रहरी कार्यालय दमकका अनुसार शव फेला परेको अवस्था शंकास्पद रहेकाले घटनाबारे गम्भीर अनुसन्धान भइरहेको छ। मृतक महिलाको पहिचान तथा घटनासम्बन्धी कुनै जानकारी भए नजिकको प्रहरी कार्यालय वा इलाका प्रहरी कार्यालय दमकमा सम्पर्क गर्न प्रहरीले सर्वसाधारणसँग अनुरोध गरेको छ।

प्रहरीले ट्याटुको तस्बिर सार्वजनिक गर्दै मृतकको परिचय खुलाउन सहयोग गरिदिन आग्रह गरेको छ।