आज ओशोको महापरिनिर्वाण दिवस । ‘निर्वाण’ शब्दको अर्थ गहिरो मौन स्थितिमा पुग्नु हो । ‘महा’ भनेको निर्वाणभन्दा उच्च र ‘परी’को अर्थ दिव्य । ‘महापरिनिर्वाण’ संस्कृत शब्द हो, जसको अर्थ परम निर्वाण वा मुक्ति हो । अतः महापरिनिर्वाणको अर्थमा जीवन र मृत्युको चक्रबाट मुक्ति भनेर पनि बुझ्न सकिन्छ ।

ओशो सन् १९३१ डिसेम्बर ११ मा भारतको कुचवाडा (अहिलेको मध्यप्रदेश) मा जन्मेका एक आध्यात्मिक नेता हुन्, जसले पूर्वीय रहस्यवाद, व्यक्तिगत भक्ति र यौन स्वतन्त्रताको एक्लेक्टिक थ्यौरीको प्रचार गरे । उनको मृत्यु भारतको पुणेमा आजैका दिन (१९९० जनवरी १९)मा भयो, जसलाई उनका अनुयायीहरू महापरिनिर्वाण दिवसको रूपले मनाउने गर्छन् । 

उनको मुख्य शिक्षा हो– प्रेम र ध्यान । संसारतिर फर्कन्छौ भने प्रेमले फर्क, प्रेम बाँड, प्रेमिल होउ, प्रेम नै संसारी जीवनको आधार हो । आफूभित्र फर्कन्छौ भने ध्यान गर, निर्विचार अवस्था वा आफूभित्र स्थिरको अवस्था हो ध्यान । संसारी भएपछि बाहिर–भित्र दुवैतिर फर्कनुपर्छ । जीवनलाई सन्तुलन राख्नु नै जीवन्त जीवन हो ।